بفضل الله اليوم تم توقيع صفقة وقف اطلاق النار في غزة .. وبكده تنتهي بمشيئة الله المعاناة الاصعب والاطول على اهل غزة .. سنة واربع شهور او 466 يوم.
والسؤال هنا ايه الجديد اللي حصل وخلى الصفقة دي تتم؟ .. وايه اللي هيحصل على الارض نتيجة للصفقة دي؟ .. ومين كسبان ومين خسران فيها؟
اول حاجة مش عايزين ننسى ان الحرب دي راح فيها 46 الف شهيد منهم 17 الف طفل و12 الف امرأة .. وتدمير 92% من البنية التحتية بقيمة 18.5 مليار دولار (مرجع 1).
ده يشمل 85% من الطرق والجامعات والمدارس والمستشفيات حسب احصاءات البنك الدولي .. ده غير محطات الكهرباء والمياة وغيرهم (2).
وضيف عليهم نزوح اكثر من 2 مليون شخص هم اهل غزة كلها .. اتعرضوا لابشع حملة تجويع وتشريد مر بيها شعب بيتنقل معاناته مباشرة عبر الشاشات (2).
ناخد الموضوع من بداياته .. للي لسه مش مستوعب.
هو ليه اصلا حماس هجمت على اسرائيل من البداية؟ .. وده بالرغم من معرفتها ان امريكا بكل قوتها وكل حلفائها مع اسرائيل!
بدون الدخول في تفاصيل ان حماس كان عندها حق او لأ .. لكن كان عندهم اربع اسباب:
1. الحصار الشديد على غزة واعتمادها شبه الكلي على المساعدات (3,4)
2. التطبيع الاخير للسلطات العربية مع اسرائيل وفقدان القضية الفلسطينية ككل (3,4)
3. الضغط الشديد من اسرائيل على القدس وسرقة اراضيها وتوسيع مستوطناتها (3,4)
4. واخيرا .. الـ 10 الاف و 300 اسير في السجون الاسرائيلية من غزة والعمل على مقايضتهم باسرى من اسرائيل (3,4)
لكن كان طوفان الاقصى او هجوم 7 اكتوبر 2023 بمثابة طبق من دهب لنتنياهو (5) .. واللي كان متحاوط بقضايا فساد حوالين رقبته .. وكان على وشك انه يتسجن زي رئيس الوزراء اللي قبله "ايهود اولمرت" (6).
مكنة الدعايا الصهيونية العالمية اشتغلت .. وخلت الهجوم اشبه بمحرقة الهولوكوست .. والى الان التقارير الامريكية بتقول ان حصل تجاوزات مفجعة من حماس اثناء الهجوم .. زي ذبح اطفال واغتصاب نساء .. بالرغم ان مفيش دليل واحد مصور (7).
في 18 اكتوبر 2023 الرئيس الامريكي بايدن زار اسرائيل .. واعطى اشارة البدء والمباركة التامة لنتنياهو واعوانه بالهجوم المضاد .. اجتياح شامل والاتيان على الاخضر واليابس .. والهدف هو القضاء النهائي على حماس! (8).
النتيجة ان بعد سنة ونص حماس لازالت موجودة وبقوة .. والفترة الاخيرة قدرت حماس تسبب خساير بشرية كبيرة في الجيش الاسرائيلي .. اكبر بكتير من وهي في اقصى قوتها في البداية (9).
بل ان تقرير جديد لوال ستريت جورنال بيقول ان اللي فقدته حماس من مقاتليها تم استعادته واكثر .. والسر هو (رجل الظل) .." محمد السنوار" (10).
القائد القسامي والمهندس "محمد السنوار" 50 سنة .. واللي خطف اشهر جندي اسرائيلي (جلعاد شاليط) سنة 2006 .. واطلقه سنة 2011 .. مقابل ايه؟ .. مقابل 1027 فلسطيني في السجون الاسرائيلية .. بما فيهم اخوه القائد القسامي (يحي السنوار) (10).
اغلب الظن ان محمد السنوار هو حاليا القائد العام لحماس .. وده بعد عدم الاتفاق على رئيس سياسي للحركة .. بسبب عدم التوافق مع المقاتلين على الارض .. والاتفاق على لجنة مؤقتة مكونة من خمس اعضاء .. لم يتم الاعلان عنهم جميعا .. ابرزهم طبعا خالد مشعل (11).
محمد السنوار قام بتجنيد عدد كبير من المقاتلين الجدد .. واللي بتقول وال ستريت جرنال ان لازالت شبكة الانفاق فعالة وتقدر تحتويهم رغم القصف .. وتم تدريبهم فيها بروح قتالية اعلى بكثير من الجيش الاسرائيلي .. اللي حاليا مفيش حافز يدفع جنوده للاستمرار في الحرب (10).
فنقدر نقول ده العامل الثاني بعد مشيئة الله .. خطة القضاء على حماس اخفقت تماما .. فكتير من التحليلات الاسرائيلية بتقول ان الكفاءة القتالية للجندي الاسرائيلي في تأخر (12).
على النقيض مع حماس الموت يستوي عندها مع الحياة حاليا .. فمن لم يموت بالسيف في غزة مات بغيره .. فالقصف والقنص والطائرات المسيرة يجي قبلها الجوع والبرد والمرض!
العامل الثالث .. الضغط الكبير من دونالد ترامب .. مبعوث ترامب للشرق الاوسط (ستيفن ويتكوف) .. لما قابل (نتنياهو) كانت رسالته واضحه جدا .. "اقبل بالصفقة وانهي الحرب" .. والا يا نتنياهو ستكون وحيدا طريدا شريدا (13).
دونالد ترامب برغم وقاحته واخلاقه المتدنية المعهودة .. الا انه اكثر رئيس للولايات المتحدة وضوحا واتساقا فيما يعلن ويخفي .. فهو ليس سياسي بتاتا ولا يبات عنده سر .. فاللي يفكر فيه بيقوله عالعلن.
ترامب من كام يوم عمل شير لفيديو سيناتور امريكي كان نازل شتيمة في نتنياهو .. وبيقول انه من العبث السياسي حصر مصلحة دولة عظمى كامريكا في مصلحة شخصية لواحد لامؤاخذة زي نتنياهو (14).
السبب اللي مخلي ترامب ياخد الموقف ده .. هو الاستنزاف المالي والهدر الكبير في الاقتصاد الامريكي بسبب حرب غزة .. وده اللي يهم ترامب واللي جاي عشانه .. "حل مشكلات الاقتصاد الامريكي، وزيادة غنى ورخاء المواطن الامريكي" (15).
الصفقة بنودها انه هيتم وقف الحرب وانسحاب الجيش الاسرائيلي على مراحل .. ودخول المساعدات باقصى قدرة لها .. وخروج متوسط 30 الى 50 سجين فلسطيني عن كل اسير اسرائيلي .. واعادة الاعمار الكامل لغزة بتمويل دولي مفتوح (16).
خاتمة:
وهنا السؤال .. مين فاز؟ .. وفقا لوزراء حكومة نتنياهو .. واللي منقلبين عليه حاليا واللي ممكن يتفكك ائتلافهم .. كلهم بيقولوا ان حماس فازت .. فهي لم تباد كما اعلن نتنياهو في البداية .. قادة حماس ذهبوا وجاء غيرهم.
واسرائيل وهتنسحب .. واكبر قادتها اتحكم عليهم كمجرمين حرب .. والصورة الذهنية العالمية عن شعب الله المختار انهارت .. ولازم لها سنين طويلة جدا لترميمها في المخيلة الشعبية العالمية.
شكرا لكل حد كتب وشارك وضغط خلال الحرب دي .. مفيش حاجة راحت ببلاش .. وباذن الله اللي جاي احسن .. والف مليون مبروك لاهلنا في غزة.
المراجع:
1. Palestinian Central Bureau of Statistics. (n.d.). Retrieved January 15, 2025, from https://www.pcbs.gov.ps/site/lang__ar/1405/Default.aspx
2. The World Bank. (2024, April 2). Joint World Bank-UN report assesses damage to Gaza’s infrastructure. Retrieved January 15, 2025, from https://www.albankaldawli.org/ar/news/press-release/2024/04/02/joint-world-bank-un-report-assesses-damage-to-gaza-s-infrastructure
3. BBC News. (n.d.). Retrieved January 15, 2025, from https://www.bbc.com/arabic/articles/c4n6d1jjlyeo
4. Al Jazeera. (2023, October 10). Why and how did Hamas execute its operations? Retrieved January 15, 2025, from https://www.aljazeera.net/politics/2023/10/10/%D9%85%D9%88%D9%82%D8%B9-%D8%A3%D9%85%D9%8A%D8%B1%D9%83%D9%8A-%D9%84%D9%85%D8%A7%D8%B0%D8%A7-%D9%88%D9%83%D9%8A%D9%81-%D9%86%D9%81%D8%B0%D8%AA-%D8%AD%D9%85%D8%A7%D8%B3
5. BBC News. (n.d.). Retrieved January 15, 2025, from https://www.bbc.com/arabic/middleeast-43063029
6. Al Arabiya. (2017, June 25). This is the man behind the wars in Lebanon and Gaza. Retrieved January 15, 2025, from https://www.alarabiya.net/social-media/2017/06/25/%D9%87%D8%B0%D8%A7-%D9%87%D9%88-%D8%A7%D9%84%D8%B1%D8%AC%D9%84-%D8%A7%D9%84%D8%B0%D9%8A-%D8%B4%D9%86-%D8%AD%D8%B1%D8%A8%D9%8A-%D9%84%D8%A8%D9%86%D8%A7%D9%86-%D9%88%D8%BA%D8%B2%D8%A9
7. NBC News. (n.d.). UN finds clear, convincing information on hostages raped in Gaza. Retrieved January 15, 2025, from https://www.nbcnews.com/investigations/un-finds-clear-convincing-information-hostages-raped-gaza-rcna141789
8. The White House. (2023, October 18). What they are saying: President Biden visits Israel following Hamas terrorist attacks. Retrieved January 15, 2025, from https://www.whitehouse.gov/briefing-room/statements-releases/2023/10/18/what-they-are-saying-president-biden-visits-israel-following-hamas-terrorist-attacks/
9. Al Jazeera. (2025, January 13). Israel tallies its dead in Gaza: Key operations highlighted. Retrieved January 15, 2025, from https://www.aljazeera.net/news/2025/1/13/%D8%A7%D9%84%D8%A7%D8%AD%D8%AA%D9%84%D8%A7%D9%84-%D9%8A%D8%AD%D8%B5%D9%8A-%D9%82%D8%AA%D9%84%D8%A7%D9%87-%D8%A8%D8%BA%D8%B2%D8%A9-%D8%A3%D8%A8%D8%B1%D8%B2-%D8%B9%D9%85%D9%84%D9%8A%D8%A7%D8%AA
10. Wall Street Journal. (n.d.). Hamas has another Sinwar, and he’s rebuilding. Retrieved January 15, 2025, from https://www.wsj.com/world/middle-east/hamas-has-another-sinwar-and-hes-rebuilding-0a16031d
11. La Croix International. (n.d.). War in the Middle East: Hamas to be led temporarily by a committee. Retrieved January 15, 2025, from https://international.la-croix.com/world/war-in-the-middle-east-hamas-to-be-led-temporarily-by-a-committee
12. ProPublica. (n.d.). Biden and Blinken face human rights criticisms over Israel-Gaza response. Retrieved January 15, 2025, from https://www.propublica.org/article/biden-blinken-state-department-israel-gaza-human-rights-horrors
13. Haaretz. (2025, January 13). Trump’s envoy forced Netanyahu to accept Gaza plan he repeatedly rejected. Retrieved January 15, 2025, from https://www.haaretz.com/israel-news/2025-01-13/ty-article/.premium/trumps-mideast-envoy-forced-netanyahu-to-accept-a-gaza-plan-he-repeatedly-rejected/00000194-615c-d4d0-a1f4-fbfdce850000
14. The Guardian. (2025, January 8). Trump video makes crude reference to Netanyahu. Retrieved January 15, 2025, from https://www.theguardian.com/us-news/2025/jan/08/trump-video-crude-reference-netanyahu
15. Brookings Institution. (n.d.). President Trump’s ultimate deal to end the Israeli-Palestinian conflict. Retrieved January 15, 2025, from https://www.brookings.edu/articles/president-trumps-ultimate-deal-to-end-the-israeli-palestinian-conflict/
16. NBC News. (n.d.). Ceasefire announced between Israel and Hamas. Retrieved January 15, 2025, from https://www.nbcnews.com/news/world/ceasefire-israel-hamas-gaza-palestinians-rcna160847
عوزين شرح وتفاصيل مراحل الحرب
ردحذفجزاك الله خيرا ع هذا المجوظ
ردحذفجزاك الله خيرا
ردحذف