حزين جدا من تعليقات منبطحة بخصوص حرب غزة .. وان اسرائيل انتصرت عشان دمرت وقتلت وشردت .. وناس عايشين وسطينا رافعين راية الانتصار الاسرائيلي اكتر من اجدعها صهيوني مخلص .. برغم ان مفيش اسرائيلي واحد حاسس بالانتصار اللي هو حاسه في نفسه ده.
ياراجل انا عايش في امريكا واكتر حرب حس فيها الامريكان بالهزيمة حرب فيتنام .. حرب فيتنام اللي قتلت فيها امريكا ٣ مليون فيتنامي منهم ٢ مليون مدني ومليون عسكري .. حرب فيتنام اللي مسحت فيه امريكا مدن من على وش الارض وقعرها حرفيا .. وصرفت عالحرب ١٦٨ مليار دولار سنة ١٩٧٥ .. اللي عاملين دلوقتي ترليون دولار بالقيمة السوقية للدولار.
اخضك واقولك ان امريكا ساعتها كانت بتعلن عن خساير بسيطة بالمئات في صفوف جنودها .. زي ما اسرائيل بتعمل دلوقتي .. ولما اتغيرت الحكومة وجت واحدة جديدة قالوا الاحصاءات المضبوطة .. وهي ٥٨ الف امريكي اتقتل هناك .. شفت الفرق المرعب .. الهزيمة مكتوبة في كل كتب التاريخ بكل اللغات .. جرب واكتب هزيمة حرب فيتنام .. مش هتلاقي فيتنامي يقولك انهزمنا زي ما اللي وسطينا بيقولوا.
انت عارف السبب الرئيسي والوحيد لهزيمة الولايات المتحدة ايه .. (الانسحاب) .. محدش فيكم بيلعب حتى (شطرنج) ويعرف ان المنسحب مغلوب حتى لو اكل الوزير وكل القطع لخصمه .. ببساطه لان المنسحب بيكون في وضع لو استمر فيه خسايره هتكون اكبر .. وده اللي حاصل في غزة خلال الثلاث اسابيع اللي فاتت .. الجنود الاسرائيليين مش عايزين يكملوا عشان مش لاقيين هدف محدد يوصلو له .. وعلى النقيض اهالي غزة بتنضم لحماس بسرعة وبكثرة .. فمن الاخر باظت من اسرائيل .. وطبعا قبل كده ارادة ربنا وتسبيب الاسباب لرفع البلاء عن الاطهار الابرار الصابرين من اسيادنا اهل غزة الكرام.
طاولة المفاوضات بيقعد عليها منتصر ومنهزم .. المنسحب منهزم مهما قال ومهما اعلن .. ورغم كده اسرائيل نفسها حاسه بالهزيمة ولم تعلن عن اي نوع من النصر .. لان مفيش اي هدف اتحقق .. فلا المحتجزين رجعوا ولا حماس خلصت او استسلمت .. قولي بقى انت حاسس بنصرهم ليه؟ .. يقولك اصل كان لازم يموت نفس العدد .. ما الحرب العالمية الثانية اللي انهزم فيها هتلر كان هو اللي قاتل اضعاف اعداءه .. يامؤمن دول ٥٠ مليون اوروبي وروسي جابهم ارض .. وبرضه هو اللي انهزم .. ببساطة لانه "انسحب" من المواجهة وانتحر .
وجماعة "ايه اللي وداهم هناك" دول مفيهومش رجا .. ولو حد دخل عليهم بيتهم و اخده منهم وسكنهم في عشة .. ومنع عنهم المية والنور والخروج والدخول .. هيقولوا رضا وكفاية انه بيدخل لنا عيش حاف ناشف من تحت عقب الباب نعيش بيه!