النهاردة ترامب هو رئيس اكبر قوة عظمى عالميا .. وبصلاحيات اكبر بكتير من فترة رئاسته اللي فاتت .. عشان حزبه هو اللي بيهمن عالكونجرس (نواب وشيوخ) .. طيب ايه التأثيرات المباشرة على المنطقة العربية؟ .. وده من واقع تحركاته الفعلية (مش تصريحات بس):
انهاء الدور الامريكي كـ (ضابط للعالم) .. فلا حماية ولا دعم للعالم الثالث ولا المنظمات الدولية وحقوق الانسان .. وتخفيض فانسحاب لعناصر الجيش من منطقة الشرق الاوسط .. واعطاء صلاحيات اكبر للحلفاء واحلال المحل ابرزهم: اسرائيل .. الامارات .. السعودية .. مصر .. فالغلبان ياريت يمشي جوه الحيط الفترة الجاية .. لكن بخصوص فلسطين فترامب مش عايز حروب تاني.
رفع التعريفة الجمركية على الواردات الصينية بمقدار ٦٠٪ .. فهتنفجر اسعار المنتجات والسلع الصينية .. وده بسبب زيادة تكاليف الانتاج وتحول سلاسل التوريد .. واللي كنت بتشتريه بمية هيبقى بـ ١٦٠ .. فدور على بدايل من بلدك لان حتى الصيني هيبقى رفاهايات .. وكلمة (يع ده صيني) اللي كنت بتقولها وقرفان هتقولها كبراندات .. وللناس اللي معجبهاش النقطة دي في التعليقات .. الصين بتصدر لامريكا بـ 500 مليار دولار سنويا .. وبتصدر لدولة زي مصر بـ 12 مليار .. الخسارة ليها بتعوضها من زيادة الاسعار عالكل مش على امريكا بس.
حملة ترحيل واسعة تبدأ من اليوم الاول .. فاللي له حد كاسر فيزة للاسف ينتظر رجوعه .. ترامب المرة دي هيطلق يد وزارة الهجرة والجمارك والسلطات المحلية والشرطة على المخالفين .. وباللذات الناس اللي عندها قضايا او مشاكل .. وكمان مفيش جلسات استماع قبل الترحيل زي قبل كده وتدوير قضايا اللجوء والتأجيلات.
التوسع الاقليمي والضغط على المحيطين .. ترامب عايز يضم كندا وجرين لاند وبنما لتقوية الاقتصاد والامن القومي .. ودي مش فرقعات .. فيه ضغط اقتصادي هيتم .. ترامب رجل اقتصاد وعايز يوفر ٢٠٠ مليار دولار هو شايف ان الاقتصاد الكندي بيستفاد منهم .. وكندا عايزة ترد بفرض تعريفات جمركية بقيمة ١٥٠ مليار على امريكا .. والغلبة للاقوى .. فالاقتصاد الكندي هيتعب حبتين واللي له ناس هناك هيتضرروا.
وطبعا كله بمشيئة الله وحوله وقوته .. لكن دي قراءة للي ترامب عين فريق ادارته على اساسه.